Tuimang Online 24hrs 7daysPhotobucket

Dear

Mangtui tawiteng


Korea ah Pawi simna:


Korea Seoul khuapi-a Yoido Full Gospel Church’vaihawmna tawh a kibawl den a 24 veina Church Growth International conference pawipi sim dingin Dr.David Yonggi Cho ii sapna tawh Tonzang VMBC, pawlpi Church Pastor Rev. Cin Do Piang , pawlpi phalna tawh ka pai a, Oct.11 ni zingsang Korea Standard Time nai 6:40 hunin ka va tung thei hi. Pawipi pen tua ni zin tun ni hi-in, Nipi ni dong kinei a, Monday ni 10:00 am pawlin kizosiang hi. Tonzang gam pan Rev.Cin Nngaih Thang, Rev. Cin Deih Thang le kei ka hi uhi, tua lo eimi zong 26 kipha hi.


Ka totna lampi hi bang hi. Oct.10, Nipi ni Kawlgam nai 6:40 nitakin Yangon International Airport pan Vietnam Airline Economic tawnin ka lengkhia uhi. Vangleng nambat pen VN 704 ahi hi. Ka tutna pen 32B hi. Tua pan Kawlgam nai 8:50 pm pawlin Vietnam gam khuapi, Hochimint khuapi ka tung uh a, tua ah nai 2:20 sung ka khawl uhi. Kawlgam nai 11:50 pm pawlin vanleng laihin VN 938 nambat tawh ka leng khiakik uh a, Pithai(Tues)ni Kawlgam nai 4:10am zingsang (Korea nai 6:40 zing) hunin Seoul Incheon vanleng tual ka tu uhi. Yangon le Vietnam kikal vanleng pen lian mawh lo napi,Vietnam le Korea kikal vanleng tawh than-in buk le inn bangin kilamdang hi. Hih ka tuanna uh vanleng pen gual khat ah mi 9 ta tuin gual 56 bang om a, kei pen 51 J ah ka tu hi. Yangon pan Seoul khuapi pen nai 7 :10 sung bang a kileng ahi hi. I tutna mai, i mai-ate tutna/kingakna nungah TV, kikoih pah a, i mai ciat pan eima ut bangbang ki-en ziau thei hi. A hun hunin duangcing melhoih vanleng nungak/tangvalten nektheih tuamtuam hong pia uh a, nek ngei loh, muhngei loh honpi khat mah a kimu, kine kha a suak hi. Kawlgam le Vietnam pen nai 2:20 kilamdang ( Gtn. I gam nai 6 pen Vietnam ni 8:20 cihna), Kawlgam le Korea gam pen nai 2:30 hun kilamdang kici hi.

CGI Conference vai:

1. 1.Pawipi tunna inntek pawlpi pen Yoido Full Gospel Church hi a, 1958May 18 ni-in Dr.Cho makai-in mi 5 tawh a kipankhia pawlpi hi-in, 2010 Nov. sazian lakna zuiin pawlpi mi 780,000, upa le makai nasem vekpi 59084 pha uhi. Pawlpi mi tamlua ahih manin khatvei kikhop tawh kikhin zo lo a, a vialvial-in kikhawmin mi tam lua kisa, miksi kua holh , i cih tawh kibang hi.

2. 2.Conference ah bel gam 65 bang panin pawlpi tuamtuam mi 17500 bang kipai a, nuam peuhmah hi. Tedim kampau mi 29 kipai thei hi. Mi a tamzaw International Prayer Mountain ah zan khat Won 5000- pia-in hong giaksak uhi.

3. 3.Tua sungin Dr. Cho pen main speaker hi a, Pasian thugen siam, minthang mi pawlkhat tawh thugenpina nei uhi. Korea pauin a kigen leh set tawh paulehna(interpreter) bil ah thuahin kingai a, TV golpite tawh a mun munah kilaksawn hi. Sermon kinei masa-in tua khit teh sumpi kaihkhopna nei zawsop uhi.

4. 4.Biakpiakna ah labupi mah ultungsak uh a, lawp-a khutbetna tawh kisa kiziahziah, la tomno sak teh diang saisai, labupi sak teh ding giugeu cihte om se lo hi.

5. 5.Korea gam mite bel Pasian thu up cihtakin a umte hi uh a, thungetna mual bangah sun tawh zan tawh thungetna kitatsat lo, awng ziahziah mawk uh a, thaman pia mahmah uhi.
6. Kawlgam pan mi tampi mah kipai a, ei khamtung mi mah a kitampen hipah hi.Oct14 Ninga ni-in 2002 Seoul World cup Stadium tualpi ah kikhopna kibawl a, mi lah tam ei, Thu le la lah kitai, mit lah kicim kei, bil lah kihampha hi.

7. 7.Dr. Cho pen maikapi bek hilo, leikha mang bangin a tuat uh a, a hi ding mah hi. Amah pen pawlpi phuakhiapa le siapipa hi mawk ahih man hi.

Seoul khuapi ah:

1. Seoul khuapi pen Hang gunpi dunga om hi a, tua gunpi in a phelkham lian cih ding hi ve. Tui tung kanna, lampi kongzingte ah lei le lamka tam lua kisa, khau kiphan kinok bang miamua hi. Et cimthei lo.

2. Seoul khuapi sungah Kawl gammite ading donghu innbelh pak ding mun, taibuk ( shelter) kici khat na kinei a, tua laiah kisuang het loin inn bangin ki-om thei hi. Korea Seoul khuapi ah Tedim kampau mi 50 val bang ki-om hi. Ei mite pawlpi khat danin na om uh a, Bokdeon Myanmar Community kici-in pawlpi Sya-in Pr. Cin Za Lian (Phaitu ) khasum tawm khat pia-in tu kum sung kizang hi.

3 Seoul khuapi ah bel na khempeuh computer system na zang uh a, bus line car-te bang hong pai ding nambat minute tua zah hong pai lai ding, a stand/stop pan hong pai ta, pai lo cihte nangawn lam lianpi geiah kilak pahpah hi.

4 Khuapi sungah thungetna mun tampi pawlpi tuamtuamin zong nei ciat uh a, pawlpi khempeuh gamtat lawpzia a kibangciat kici hi. International thungetna mual ah thungetbuk 207 om a, tua lo mun tampi mahah thunget theihna ding mun om zihziah hi. Thungen mi sun tawh zan tawh tatsat lo hi.

5 Korea gam bangin gam khempeuh ah Pasian thu zuihna kicitak, kilawp hi zen leh leitung gam bel Pasian thu ah a kini khan ding dan ahi hi. Pastor hi ding peuhmah antan thunget a nuntakpihte kizang bek ci lai uhi.

6 Seoul khuapi sungah lai khempeuh Korea lai bekbek kizang, kigelh a, mun khatkhat ah manglai tawh kigelh kiaukiau bek hi. Khuami a tamzaw Mangpau thei lo uh a, thusim mello, a paute neu-et nuamzaw zek bang khatin khuamite omse uh a, nuam mel lo hi.October pawl pen ei gamah December kim pawl mah bangin khuavot hi, inn sungah kibukual zaw ciat hi.

7 Khuapi nuai lei sungah meileng lampi thuap thum bang omsuk a, line 13 bang nei ta uhi.Leitung tawh leinuai tawh a kipai ngeigai ahi hi.

Ka lungdamna lai-in gen nuam ing.

(a) Zing ka zinna Korea gamlei vangin la ei, Sian aw lum bang nong sunna hi e.

(b) Lum bang nong sunna hi e Sian, thang van sangah va bang lengleng tang e.


Tangko ahsuahsak ding hi,. attach tawh hong khak ing.

Church Pastor

VMBC,Tonzang

Stay.:South Korea

Views: 39

Comment

You need to be a member of TUIMANG first TECHNOLOGY CENTER to add comments!

Join TUIMANG first TECHNOLOGY CENTER

© 2022   Created by Tuimang Vangkhua.   Powered by

Report an Issue  |  Terms of Service