NETHERLANDS KHUALZINNA LEH LUNGDAMKOHNA

[Tuimang Vangkhua]

NETHERLANDS KHUALZINNA LEH LUNGDAMKOHNA

I. Netherlands (Holland)

Netherlands a khiatna in tuipi sangin niamzaw (below sea level) gam cihna ahi hi. 1983-84 laisin kum in Primary sangah tan nih ka sinkum hi a, Tan nih Zolai Simbu sungah, Holland gam naupang pa thu kisin kha citciat hi. Holland gam in tuipi sangin a niamzaw gam ahih mah bangin, tuipi, tuikhang hangin mitampi in, a nuntakna uh a beilawh ngei gam khat ahi hi. Tua man in, tuilam tawh nasepna ah a siampen gam ci in Netherlands in minphatna ngah hi.

Kum 1983-84 kimpawl in tan nih Zolai Simbu sungah Holland gam naupang pa in a khua a tui a itna thu kigelh hi. Tua thu a tom in hi bang ahi hi. Holland gamin tuipi maitang sangin a niamzaw gam khat a hihmah bangin, tukhun ciangin tui nasia takin khang ahihman in a khua a tui te uh tui in tumcip zelzel hi. Tua man in, tuikhang hunciangin tui in a khua a tui uh a suksiatlohna dingin limtakin tuidal abawl zelzel uh hi. Khatvei naupang khat avak leh, a khuadalna uh tuidalnate kisia in, a khuasung uh ah, tui luangding akipan amu hi. Tua naupang pa in, hih tuikeh kadal kei leh, zankalsungin ka khua ka tui uh, tui in hong tumcip tading a, inn leh lo kisia bek hilo in, mitampi takin sihlawh ding hi cih ngaihsun ahihman in, tua tuidalna a kisiatna mun ah, a pumpi tawh zantha pai in dalniloh ahihman in, a khuasung uh ah tui a lut thei kei hi. A zingciangin sabeng te tua tuidal omna lam zuanin hongpai uh ciang in, tua naupangpa amu uh hi. Naupang pa in, hihlai mun ah tui a dallo hi leng, tu zankal in ih khua ih tui kisiacip khinzo ding hi ci in, sabeng te kiangah gen hi. Hih naupang pa hangin, a khuazaang bupun suahtakna a ngahlam uh a ki theihciangin kumpite lungdam lua in, tua naupang hoihpa tungah lungdamna letsong tampi a pia uh hi.

Hih naupang pa Tangthu tan nih kasin lai in Sia Nang Khan Thang (Tuimang) in hongsinsak a, laisin ka man khituh ciangin, no teng lakah Holland gam a painuam na om uh hiam ci in hong dong mawkmawk hi. Bang lungsim neikha mawk hi ding ka hiam,, KEI’’ ci in ka ot velval leh ka lawmte in hong nuihsan ngeingai uh a, ahi zongin, tua zawh kum 22 khit, 2006 kum in Master sin dingin Pasian in hongpai sak hi. Lamdang kasa hi.

II. Netherlands Gam Zomite

Netherlands gam ah tutadihin Zomi nih bekbek om uh hi. Tg. Zo Khai Thang (Kam Khan Pau) Utrecht ah teenga, Pa Go Sutt Thang a hih leh Amsterdam ah teeng hi.

III. Lungdam Kohna

November 10 ni, Protestant Church Polity Conference ka man ciangin Zo Khai Thang in Central Train Station ah hong dawna, ama kiang a hi Utrecht ah zan khat ka tam hi. Amah tawh abeisa 2006 kum, Kampen University ah ka sangkah lai in, a ki musa, kitheisa ka hihman un, ka ki muh phetun ka thugen ding uh khawltheihloh zahdongin hong tam hi. November 11 ni in Utrecht to Amsterdam ka paiciangin, a sangkah ding, a nasep ding teng nusia in Zo Khai in Amsterdam dong hong khasuak hi. November 11 ni sun sungteng Museum hita leh, Amsterdam khuapi sung a om, mun thupi tuamtuam ah hong vakpih kawikawi a, hampha ka kisa hi. A hun hongpiak bek hilo in, Leitung mi thupi tuamtuam te lim (statue) te kikoihna MADAME TUSSAUDG hong pai pih hi. Tua sung lutna dingin mikhat lutman Euros 25 Euros ahi hi. Tua ban ah, theihhuai leh muh ding a ki lawm museum tuamtuam te ah Zo Khai in hongvakpih kawikawi hi. Lungkim huaitak in mun thupi tuamtuam ka mukha a, angtang in hampha kaki sa hi. Sum leh paai, vaikhempeuh ah Zo Khai in tavuan hong laksak hi.

November 11 ni zan, Amsterdam a om Pa Go Sutt Thang (Gamngai) kiangah ka tam a, Tg. Zo Khai zong tua zan in ko tawh hong tam khawm hi. U Suttpu pen thu leh la kiva mi khat a hihman in, Pasian thu, Zogam leh Zomi te’ thu hong kuppih a, thu gending thei in, kamtam ahihman in amah tawh ki kholh nuamka sa hi. Tutna khawlna leh vai khatpeuhpeuh te ah inntek lungsim nei thei dingin mi hopih dan siam ahihman in leitung pianzawh ka kimuh cilna uh a hih hangin sungkhat suak unau bang in, kam ka ki kum khawm thei uh hi.

November 12 ni in Amsterdam to Hamburg zuanding in ka ki thawi ciangin U Suttpu leh Zo Khai in Schiphol Airport, Amsterdam ciang dong hong kha vangvang uh a, vanleng tualsungah hunpha kangah khawm thei lai uh hi. Holimna leh photos kilakna hunnuam ka ngah khit nung in, ka lending hun hong naita ahih man in, kiho nuam lai pipi, Mangpha maw ci in, khut kileen in ka paina ding tuak uh ka zuanta uh hi. Tutna, khawlna, giahna, nekna dawnna leh na khempeuh ah, itna hong lakin a thusiamnate uh kathuk kik zokei ding hi. Amaute hongitna leh hong nekngaihna te hangin ka lungdamna hih laitung tawn in ka pulak hi.

Cikmah hunin kithei ngei kei ta leng, ih sisan in thugen a, sialvom leh sialvom kingai ci in khang masate in agen bang un, ih Zomi hihna in hong ki itsak a, Zomi hih nuam ka sa ngaungau hi. Zomi a hong bawl, hongpiangsak Pasian min ka phat hi.

CSKhai

Hamburg

November 13, 2011