Numei Pil ( ZIPIL )

[Tuimang Vangkhua]

“Hmeichhe khawsak tha chu a pasal tan lallukhum a ni a, zahpuiawm tak thil ti ti erawh chu a ruh timawihtu a ni”. (Thufingte 12:4)

“Hmeichhe khawsak tha tunge hmu thei ang? Aman chu lunghlu sen mi aiin a sang zawk daih si a. A pasal thinlung chuan a ringa, chhawrna a hmai lovang” (Thufingte 31:10).

Mi ‘inti pa’ tamtak aiin, hmeichhe tamtak hi an ngaihtuahna fimin, thil tihna kawngah an sincere zawk fo. A hmang tangkai thiam te tan chuan, ‘an felna’ hi mipa thahrui ang a ni. Kan tunlai Office-ah pawh hian, Officer lian tamtakte ‘kutke’ (Personal Assistant/secretary) leh ‘backbone’ te hi hmeichhe fing leh fel an ni duh khawp mai.

Mizoramah phei chuan, mipa te intih mipat avanga ruihtheih thil mi tamtakin an tih avangin (e.g: officer thenkhat emaw a hnuai deuh pawh nise, ‘zu’ hi rual pawlnan in ngei ngei tur a ngaihna an nei thin) extra pawisa anlo mamawh a, ram tan a hnathawhna kawngah te, rinawmna kawngah te, chhungkaw inenkawlna kawngah an ngaihtuahna a fim tawk thin lova, nupuite leh fate tan pawh zahpui-awm tak an ni fo thin. Hetiang mite awpbehna hnuai-ah chuan, hmeichhe fin pawhin tuikhur ral a kai har viau ta ve ang.

Ruih theih thil avanga ngaihtuahna fimlo tak tak ‘ram hruai tir’ fo te, sorkar ‘dinhmun pawimawh’ a dah fo te ai chuan, hmeichhe ngaihtuahna fimtak leh felna kha – political party ah pawh, office ah pawh, chhungkuaah pawh, kohhran ah pawh a hmang tangkai thiam chuan – an din chhuahpui thei a ni. Pathianin hmeichhia kha siam nachhan a nei a, “Mihring hi a mah chauh a awm hi a tha lo ve: amah tanpuitu tur a kawppui awm mi ka siamsak teh ang” (Ge. 2:18) a ti. “Kan chuanna motor a that zawh poh leh, kan thleng hla thei”. Chuvangin, Pathianin a tanpuitu atana min pek te hmang tangkai thiam thiam hian, Pathian thu an awih a, an vanneih phah thei zawk a ni. Rawngbawlna kawngah pawh, nupuiten an hriatpui lemloh leh ngaihsak pui loh, tawngtaipui loh te rawngbawlna aiin, nupuiten an tawi-awm that te rawngbawlna hi ‘a nung’ zawk fo thin.

Mingo tamtak te hi, hnam fing zawk leh thil hre zawk an nihna a tam mai, mahse, mahni hmasial tak hnam an nihna a lang ve fo thin. Mizoram min enkawl lai pawh khan, hmangaih takin min chawi kang tih chu hai rual a nilo, chutih rualin thil tamtakah, an mahni khum thei lo turin, ‘limit’ min siamsak tlat thin niin a lang. Tin, an kalphung leh tihdan tamtak, culture te thlengin, zirtur tamtak kan neih rualin, kan ‘apply’ ve loh tur chi a tam hle….Mizo kan ni tlat a.

Tunlai khawvel ah hian, hmeichhia te tangkaina leh hmantlakna hmuh thiamna tarmit bun-chungin, an in an vek lohna thliar thiam chunga ‘balance,’ taka kan dawm kan thiam chuan….kan lallukhum an ni thei a ni. Hmanlai pi leh pute kha, an hun lai ngaihtuahin finna anlo ngah riau a ni. Pi leh Pu te, khawtlang rorel dan leh inkaih hruai dan kha zir chian a phawrh chhuah fo hi a tul zel ang.

Chutih rualin, ‘Kohhran lam thil’ ah hi chuan, ‘Pathian ta leh Pathian thil bik’ a nih tlat avangin – fimkhur a ngai hle. Kohhran kaihhruaina “Bible zirtirna” hi bih ngun a tha. “…Thisen a lei….Puithiamah te a siam tak…” (I Pe. 2:9; Rev.5:10) tih hian hmeichhiate pawh a huam ve rual rualin, rawngbawltu dinhmun leh mawhphurhna pawimawh tak chelh ve thei mahse, kohhranah leh chhungkua a ‘leadership’ lam erawh chu a kawk lemlo (I Co.11:3, Eph.5:22).

Hmeichhe fing leh lehkhathiamte hian pasal zahna leh an hnuaia intukluhdan an thiam zel thin. British PM Margaret Thatcheri pawh khan British lal ram PM a ni chung khan, a hman a nih ngat chuan, a pasal ei tur chu a mah ngeiin a siamsak (a serve) thin an ti tlat nia maw le. Tunlai kan Mizo hmeichhe lehkha thiam tamtakte pawh hi “good example” an ni a, ‘chawimawi’ leh ‘dinhmun pawimawh phu’ an tam ta hle….

Mipa kan in ang vek kherlo ang deuhvin, Hmeichhe ho pawh hi an in ang vek lemlo a, hmeichhia zahpui awm ve tak tak an awm theih laiin, hmeichhe tamtak hi chu, “Hmei – tha” tih hial tlak an awm chu a nih hi. Chuvangin chungnun tir lam nilovin, Mipa te tanpui tura siam an nih angin, Mipa te hian rapbet lovin, kohhran leh khawtlangah te pawh, an tangkai theihna chi ah i hmang tangkai thiam ang u.

Andrew Kap