Pasian kihel loin.....

[Tuimang Vangkhua]

Pasian kihel loin.....

Pasian kihel loin kua in anne in nuamsa thei ding a hi hiam? (Thuhilhna 2: 25)

Vantung leh leitung, na khempeuh, mihing, ganhing hong piang sak Pa
pen Pasian hi-a, tua na khempeuh te Pasian neihsa, Pasian a' ahi hi.
(Pian. 1:1-30; IKhang.29:11; Late 24:1; Rom. 11:36). Liatna,
vangliatna, minthanna, gualzawhna, minliatna, minphat na, hauhna,
zawnna, niamkhiat na, lapsangna, thahatna, thakhauhsakna, liatsakna,
hinsakna, thahna, etc., na khempeuh Pasian a' hi a, Pasian in tua te
khempeuh uk in, Pasian khut sungah om hi. ( IKhang. 29:11-12; ISam.
2:6-8). Na khempeuh Pasian kiang pan hong pai hi a, Pasian hang bek
mah in ih ngah ih zang thei hi. (Rom.11:36; IKhang. 29:14). Ih
nuntakna ah ih zat nop ih kisap khempeuh Topan nei hi. ( Pau. 8:18).
Na khempeuh a pia pa leh a la kik pa Pasian a hi hi. ( Job. 1: 21).
Singkung sangte phuk in, singkung neute a liansak pa, singkung hingte
keusak in, singkung keute a hingsak kik Topa ahi hi. (Ezk. 17:24). Na
khempeuh a hih nop bang bang a, a hih thei Pasian hi a, ( Job. 42:2;
Lk. 18:27), na khempeuh a ma thu neih na nuai ah om hi cih phawk
tawntung ni. (Late 115: 3).
Tua ahih manin Pasian kihel loin hauhna liatna zong keini, Pasian
kihel lo in pilna siamna zong kei ni. Pasian kihel loin zakhan,
zaliatna zong kei ni. Pasian kihel loin minliatna, minphatna,
gualzawhna leh nopsakna te zong kei ni. Pasian kihel loin nungta in,
gamta kei ni. Pasian kihel loin vaihawm kei ni. Pasian kihel loin
nuntakna, hauhna, nopsakna, neihsate kip loin zong bit lo hi. Pasian
kihel na bek ah nopna, lungmuanna, lungkim na leh pungna, khanna,
lapsangna te om in kip in bit zo bek hi.Tua hi a, Pasian pen mangngilh
theih ding leh nusiat theih ding hi lo hi.
Thuhilh sia pa cih bangin," Pasian kihel loin kua in anne in nuamsa
thei ding ahi hiam?" cih phawk gige in Topa nang loin ko guak hong kal
suan sak kei in ci-in Topa ompihna Topa makaihna, Topa lamlahna leh
Topa tawh kilawmtatna te lunggulh in Topa tawh nungta khawm, vaihawm
khawm, kalsuan khawm ciat ni. Pasian kihel loin na khempeuh hi thei
het lo hi cih phawk tawntung ni.


Nute ni ,pate ni hong tun sim a,phawk den ding thu in;
LEITUNG PASIAN

Na khempeuh piangsak in a bawl a nei pen vantung Pasian
hi-a,leitungah mihingte Pasian in hong bawl khit ciang in suan le khak
nei ding le khang ki zom toto ding in hong bawl hi.Mihingte singhawm
suanghawm pan ki piang loin gui le zaam,beh le phung nei in Pasian in
hong bawl hi.Mihing khat hong pian khiat theih na ding in Pasian in
nulepa hong pia in nulepa sungpan ki piang ciat hi.Tua Pasian hong
piak nulepa te in i suah a ki pan hong kem hong don,hong pantah,hong
puah hong zuun ahih manin Pasian in thupha hong piak ding ciangin
nulepa tungtawn mah tawn in thupha hong pia hi.Tua ahih manin nulepa
te pen tate adingin “leitungpasian”ahi uh hi.
Leitungah Pasian lobuang nang hong it hong ngai pen ,hong deihsak
pen,hong khual in hong lainat pen in na lawmlena gualte hilo,na zi na
pasal,na tate hilo in na nu na pa ahi hi.Na nu na pate pilin hai
taleh,hau in zawng taleh,siamin siam kei taleh,mel hoih in hoih kei
taleh na thupha ding khempeuh midang te tungah omlo inna nu na pa
tungah om hi.Pasian in nang ading in na thupha nak ding ahi “leitung
pasian” ding in hong piak ahi hi.Piancilna 49:26 ah “Na pa thupha te
pen tawntung mual liante’ thupha,tawntung mualneu te’tamna sangin
vanglian zaw hi.”na ci hi.Nulepa te pen kham le ngun,hauhna,pilna,na
dang khempeuh sang in vanglian zaw,manpha zaw hi cih hong thei sak hi.
Tua ahih manin nulepate gina in gina kei taleh hong itna,hong
kepna,hong zuunna,hong panpahnate lungngai kik in,nulepa tungah lung
damko kawm in pahtawi theih bangbang in pahtawi ciat ni.I leitung
pasian ahi nulepate it-in kemin,vaakin,donin,zuunkikin,puahin,zahtakin
pahtawi ciat ni.Itna in itna mah lamen hi.
“Topa note Pasian in hong leitang tungah na khan’ uh sau in na nopsak
theih na dingun Topa note Pasian in hong thupiak bangin na nu na pa uh
zahtak un.”Thuhilhkikna 5:16