UI leh Gentile

[Tuimang Vangkhua]

Lai Siangtho ih sim teh Judah mite in ui le Gentile te ci-in hong bawl
uh hi. Judah mi ih cihte pen Israel ahih kei leh Jews ih cihte hi. Tua
lo khempeuh Gentile te hi hang. Greek, Romans, German, India, China,
Japan, Myanmar cih bang danin Judah mi ahi lo khempeuh Gentile te ih
hi uh hi. Lai Siangtho ih sim teh Judah mite' muhna ah eite pen Ui
hong kicite hi. Tua ahih manin ui le gentile mite a ci ih hi hi.

Ui le Judah mite
Judah mite in Pasian teel tuam ahihna uh kisak theihpih khial uh ahih
manin Messiah Jesuh Khrih na sang lo-in na that vial uh hi. Tua ahih
manin tua Judah mite pen galpi nihna lai aa kipanin leitung in Ui tawh
kibang hi ci-in na simmawh hi. A diakdiakin Germany gam bangah ui le
Judah mite' pai theih lohna ding ci-in mun tampi ah lai kisuang hi cih
a nuai aa ka lawm CSKhai' lai gelh na sim lecin na um ding hi.

Ui le Judah mite vs. Ui le Gentile mite
Ui le Gentile mite ci-in hong kisimmawh hun a om mah bangin ui le
Judah mite ci-in a kisimmawh hun zong om veve hi. Leitung ah mihing'
mawhna hanga simmawh a thuak lo minam kuamah om tuan lo hi.
Kisimmawhna hun hong tung khin zo a, tu-in Jesuh Khrih sungah kilemna,
minam khat ih hihna hangin tate cihna za ih ngah khin ta hi. Ih vekin
ui cihna zaa ih ngah khit ciangin tu-in tate cihna zaa ih ngah ta hi.
Tua pen Jesuh Khrih ong tatkhiatna sisan hang ahi hi. Ui le ui kipet
nawn lo ding hi hang. Khrih sungah Judah mi, Gentile mi, Greek mi,
numei pasal, silate, tote cih bangin kideidanna om nawn lo-in, ih
vekin Khrih mi ih hi thei ta hi. Mawhnei mite (uite) le Pasian' kikal
ah Jesuh Khrih in kilemna (reconciliation) ong bawl sak khin zo hi.

Topa' tungah lungdam mahmah hang
ZOMI Paal